អគ្គស្នងការដ្ឋាននគរបាលជាតិ ជំរុញឲ្យនគរបាលការពារព្រំដែនទាំងអស់ត្រូវបង្កើនការរឹត បន្តឹងជុំវិញ ការងារសន្តិសុខ
17-March-2016 | ដោយ មែន កំសត់
ភ្នំពេញ ៖ អគ្គស្នងការដ្ឋាននគរបាលជាតិ បានជំរុញឲ្យនគរបាលការពារព្រំដែនទាំងអស់ត្រូវបង្កើនការរឹតបន្តឹងត្រួតពិនិត្យឲ្យបានច្បាស់លាស់នូវការចេញចូលនៅតាមតំបន់ព្រំដែន បង្កលក្ខណៈល្អប្រសើរឲ្យប្រជាជនចេញចូលឆ្លងព្រំដែនស្របច្បាប់ តែត្រូវតែម៉ឺងម៉ាត់ តស៊ូប្រឆាំងគ្រឿងញៀនឆ្លងដែន ការរត់ពន្ធ ជួញដូរពលកម្មឆ្លងដែន និងសកម្មភាពឆ្លងដែនខុសច្បាប់នានាទៀត។
នៅក្នុងសន្និបាតបូកសរុបសភាពការណ៍ និង លទ្ធផលប្រតិបត្តិរក្សាសន្តិសុខ សណ្តាប់ធ្នាប់សង្គមឆ្នាំ២០១៥ និងផ្សព្វផ្សាយទិសដៅអនុវត្តបន្តរបស់អគ្គស្នងការដ្ឋាននគរបាលជាតិនៅ ព្រឹកថ្ងៃទី១៦ ខែមិនា ឆ្នាំ២០១៦ នៅ សាលប្រជុំ ក្រសួងមហាផ្ទៃ ឧត្តមសេនីយឯក ឆាយ គឹមឃឿន ប្រធានសេនាធិការអគ្គស្នងការដ្ឋាននគរបាលជាតិ ថ្លែងថា៖ ថ្វីបើសភាពការណ៍សន្តិសុខសណ្តាប់ធ្នាប់នៅតាមព្រំដែនទូទៅជារួម មានភាពស្ងាប់ស្ងាត់ជាធម្មតាក៏ដោយ ប៉ុន្តែបទល្មើសឆ្លងដែនខុសច្បាប់ចូលមកកម្ពុជា តាមតំបន់ព្រំដែននៅតែបន្តកើតមានដដែល។
នៅក្នុងឆ្នាំ២០១៥នេះ មានសកម្មភាពមិនប្រក្រតីជាច្រើនបានកើតឡើងនៅតាមព្រំដែនទូទៅ ដែលក្នុងនោះកងកំលាំងនគរបាលបានរកឃើញបទល្មើសនោះបានកើតឡើងប្រមាណ៤៦០លើក ក្នុងនោះនៅតាមព្រំដែនថៃកើតឡើង៣៨០លើក វៀតណាមកើតឡើង៦១លើក និងព្រំដែនឡាវកើតឡើង១៦លើក។
ក្នុងចំណោមបាតុភាពមិនប្រក្រតីដែលកើតឡើងនៅតាមព្រំដែនទាំងនោះ គឺមានដូចជា រំលោភដែនអាកាស បិទច្រកទា្វរបៀងឯកតោភាគី រាយបន្លាលួល ការចូលមកធ្វើស្រែនៅតាមតំបន់ព្រំដែនដែលមិនទាន់មានការវាស់វែង ការចូលមកដោះមីនតាមអូរព្រំដែន ការចូលឈូលឆាយដីធ្វើផ្លូវនៅតំបន់ព្រំដែន ការហាមឃាត់ពលរដ្ឋខ្មែរមិនឲ្យធ្វើស្រែនិងដាំដំណាំផ្សេងៗ៕
ចំនួនអ្នកទស្សនា
- ថ្ងៃនេះ5471
- ម្សិលមិញ15681
- សប្តាហ៍នេះ64311
- ខែនេះ86191
- ឆ្នាំនេះ86191
- សរុប20528647